Cabrido namolitika: Fortuna

CEBU, Philippines - Nagduda si Bise Mayor Carlo Pontico Fortuna nga adunay sagol pamolitika ang bahad ni Atty. Benjamin Cabrido tungod sa bahad niini pagpasaka og kaso sa konseho sa dakbayan sa Mandaue tungod sa wala pagsuporta sa programa ni Mayor Jonas Cortes alang sa paghipos sa mga basura.

Si Fortuna sa dihang nahinabi sa usa sa mga estasyon sa radyo nagkanayon nga dili mahimong mandaran ni Cabrido ang konseho kun unsay angayan buhaton niini tungod kay ang mga sakop niini anaa na sa saktong kabuot.

Ang bahad ni Cabrido gihimo human masayri sa Department of Environment and Natural Resources (DENR-7) Solid Waste Management ug ni Fortuna nga ang Umapad dumpsite pabiling bukas ug padayong gilabayan og mga basura, sukwahi sa pangangkon ni Cortes nga sirado na kini. Ang mayor nakadawat og award tungod sa pagpatuman sa Solid Waste Management Act (RA 9003) sulod lang sa duha ka bulan.

Apan si Cabrido nagkanayon nga dili sila magpanuko pagpasaka og kaso batok ni Fortuna ug sa mga konsehal sa siyudad kun padayon niining babagan ang P33 milyones nga gipangayong gahin alang sa eco park sa Umapad. Matud ni Cabrido nga ang padayong pagbabag sa konseho sa Mandaue sa maong gahin sama lang nga gibabagan niini ang pagpatuman sa balaod sa tukmang paghipos sa basura.

Si Fortuna nagkanayon nga legal ang ilang pagkuwestiyon sa proposal ni Cortes tungod kay wala kini mga suportang mga dokumento ang planong pagpanindot sa dumpsite ug ang eco park project hinungdan nga ila kining gihikling.

Sumala pa ni Fortuna nga dili angayang manghilabot si Cabrido tungod kay wala kini masayod sa ilang trabaho isip mga sakop sa konseho sa Mandaue. – BANAT NEWS