Apo ni Ouano naigo sa saag nga bala

CEBU, Philippines - Usa ka tres anyos nga apo sa igsoon ni kanhi Mayor Thadeo Ouano sa dakbayan sa Mandaue, naangol human kini masabak sa saag nga bala didto sa sitio Hi-way 77, barangay Talamban, ning dakbayan sa Sugbo kagahapon sa alas 5:00 sa kabuntagon.

Si PO3 Geoffrey Gutual sa Talamban Police Station miila sa biktima nga si Jasper Ouano, 3, nga taga Hi-way 77, apo ni Jeffrey Ouano, ang igsoon ni kanhi Mayor Teddy Ouano, kinsa diha pa sa higdaanan dihang gipukaw sa usa ka saag nga bala.

Saysay pa sa apohan sa biktima nga samtang nahinanok sila sa pagkatulog sulod sa ilang balay maoy namat-an nila ang usa ka sipa kaayong boto sa armas de fuego gikan sa gawas sa ilang balay.

Unya dungan sa maong boto mikulisiw og tiyabaw ang biktima sa sulod sa lawak niini ug sa pagsusi pa nila, nakurat nalang sila dihang nagkadugo na ang walang bahin sa lawas sa bata.

Dali nilang gihatod ngadto sa North General Hospital aron matambalan ang samad niini.

Nasayran sa Banat News nga ang biktima anak ni John-John Ouano kinsa gipatay usab niadtong Mayo 25, 2007 sa dakbayan sa Mandaue.

Unya si Lester Bontoyan nga biyuda ni John-john nga maoy inahan sa bitimang bata naminyo na pag-usab, ug gisusi pa sa kapolisan karon kun ang namusil sa balay ni Bontoyan wala bay pagdumot sa biyuda ug sa bag-ong bana niini. -  BANAT NEWS