2 motor nagsampok 1 tipi

CEBU, Philippines - Patay ang usa ka tawo nga nag-angkas sa motorsiklo dihang kalit lang nagbangga ang gisakyan niining motorsiklo sa laing motorsiklo nga miresulta usab sa pagkaangol sa duha ka drayber sa milabay'ng kaadlawon diha sa dalan Jose P. Rizal, barangay Basak, dakbayan sa Mandaue.

Si SPO1 Francisco Balansag Jr., sa traffic division sa Mandaue City Police Office (MCPO) miila sa namatay nga mao si Mecias Franza Jr., taga Consuelo Village sa barangay Basak sa maong dakbayan.

Ang namatay maoy angkas sa motorsiklo nga gidala ni Arturo Castro Franza, 41, nga nagpuyo usab sa maong dapit samtang ang gikasungag nilang motorsiklo gimaneho ni Angelito Getalado Calva, 36, taga Poblacion, Liloan.

Ang duha ka motorsiklo gikan sa managlahing direksyon ug dihang nagkadasmagay sa maong dapit ug parehong nangalamba sa awto nga gimaneho ni Carlos Salodar Roble, 59, taga Villa Concheta Village sa lungsod sa Liloan.

Matud pa ni SPO1 Balansag nga ang duha ka mga sakyanan nga pulos kusog kaayong nagdagan subay sa maong dalan ug gikatahong parehong mikawat na sa pikas lane hinungdan nga nagsampok gyud diha sa tunga. -  BANAT NEWS