Hapon gikawatan nagtibi

CEBU, Philippines - Nasakiyo sa wala hiilhing kawatan ang bag nga may sulod nga P15 mil sa magtiayong Hapon sa usa ka restaurant sa M.L Quezon sa dakbayan sa Lapulapu sa milabay’ng gabii.

Ang biktima mao si Echi Kato, 63, minyo, usa ka Japanese national ug temporaryong nagpuyo sa Blue Water sa barangay Maribago dakbayan sa Lapulapu.

Si SPO1 Danilo Aying sa Crime Against Person (kanhi TRS) sa Lapulapu Police Station mibutyag sa Banat News nga si Kato uban sa iyang asawa namakasyon dinhi sa Sugbu ug nangaon sa usa ka kan-anan diha sa M.L. Quezon.

Gumikan sa kalami sa ilang panihapon, wala nila mabantayi ang tawo nga pilit og kamot nga misakiyo sa bag sa magtiayon.

Mihiwasa si Kato sa kapungot ug nagkayuring sa pagbagutbot og Hinapon dihang nadiskobrehan nila nga wala na ang bag nga may sulod nga P15 mil cash ug usa ka cell phone.

Ang magtiayon wala na makabayad sa ilang panihapon ug nagtibi kining misumbong sa kapolisan.

Apan ang kapolisan wala usay nahimo tungod kay dihang gipakita nila sa magtiayon ang mga hulagway sa mga banggiitang kawatan sa dakbayan sa Lapulapu, walay natumbok ang magtiayong langyaw. (Bong Soriano)    (BANAT NEWS)