CEBU, Philippines - Dul-an sa 100 ka mga ilegal nga estraktura ang gitakdang i-demolish sa Squatters Prevention Encroachment and Elimination Division (SPEED) sa Cebu City Hall ugmang adlawa.
Ang panggub-on sa mga sakop sa SPEED anaa mahimutang sa luyong bahin sa karaang planta sa Pepsi Cola diha sa barangay Mabolo ning siyudad.
Matud sa hepe sa SPEED nga si Vicente Mercado nga nadawat na sa mga hingtungdan ang demolition order nga gipirmahan ni Mayor Tomas Osmeña.
Nagkanayon si Mercado nga ang Gaisano Incorporated maoy nireklamo sa mga illegal structures tungod kay kini giingong nakahasol sa gitukod niining building sa maong dapit.
Gipadayag sa labaw sa SPEED nga kung walay kakulian ug dili sila makadawat og hold order, ilang ipatuman ang demolition order ugmang adlawa.
Sa susamang kalamboan niingon si Mercado nga laing 64 usab ka mga illegal structures ang gitakdang i-demolish sa SPEED sa mosunod nga mga adlaw.
Nagkanayon ang hepe sa SPEED nga ang mga illegal structures anaa mahimutang sa dalan Zamora ning dakbayan atbang sa Basilica del Santo Niño.
Partikular nga maapektahan unya sa demolisyon mao ang mga naninda og pagkaon sa maong dapit, ingon man sa mga buwak, prutas ug uban pa. (BANAT NEWS)