Mga tunghaan di mamayad og buhis pugngan gamit sa yuta

CEBU, Philippines - Pugngan na sa kagamhanan sa dakbayan sa Sugbu paggamit sa ilang mga propiyedad ang tanang delinquent taxpayers dinhi sa siyudad kini maoy bahad ni City Treasurer Ofelia Oliva.

Lakip sa pugngan nga dili na makagamit sa ilang mga real properties mao ang pito ka mga proprietary schools ug hospitals nga nikiha sa City government.

Kini naglakip sa Cebu Doctors’ University, Cebu Institute of Technology, Southwestern University, Sacred Heart Hospital, Cebu Doctors’ Hospital, Cebu North General Hospital, ug Velez General Hospital.

Misang-at og reklamo ngadto sa hukmanan ang maong mga tunghaan ug tambalanan ug ilang gikwestyon ang ordinansa sa dakbayan nga magkolekta kanila og buhis.

Nagdumili pagbayad og business tax ang mga tag-iya sa nahisgutang mga proprietary schools ug hospitals tungod kay sila giingong exempted sa balaud.

Apan gipadayag ni Oliva nga karong semanaha ila nang sugdan pagpadala og certificate of tax delinquency ang tanang langayan nga mamayad og buhis.

Human niini, miingon ang City Treasurer nga ila dayong ipublikar ang mga delinquent taxpayers sa dili pa isubasta sa siyudad ang mga real properties niini.

Labing minos 50 ka dagkong business establishment sa dakbayan ang padalhan og certificate of tax delinquency sa kagamhanan sa dakbayan sugod niining semanaha.

Gitakda na sa City Treasurer’s Office ang pagsubasta sa mga kabtangan unya sa sunod buwan diin mahimo pa hinuon kining malukat sa mga tag-iya sulod sa usa ka tuig.

Matud ni Oliva nga kung mobayad lang sa ilang obligasyon ang nanag-iya sa maong mga establisamento, ang siyudad mokita og P400 milyunes   sa business ug real property tax.

Gitataw hinuon sa City Treasurer nga mahimo ra nga makigsabot ang mga delinquent taxpayer sa siyudad kung kini bug-atan ra sa ilang bayranan. (BANAT NEWS)