Mi-peke og voucher sikop

CEBU, Philippines - Gidakop ug gibalhog sa bilanggoan ang usa ka kawani sa lungsod sa Daanbantayan human giingong nasakpang nanghimo og peke nga mga vouchers aron makakobra alang sa iyang personal nga katuyo-an gikan sa financial assistance sa lungsod alang sa mga kabus.

Ang gidakop nga kawani ug gipasakaan og kaso mao si Editha Chu nadestino sa Municipal Social Welfare Development (MSWD) ug maoy in-charge pagproseso sa mga vouchers niadtong mangayo og tabang sa maong buhatan.

Matud pa ni Bise Mayor Maria Luisa Malou Loot atol sa interbyu sa DyDD gidakop si Chu niadtong   Sabado kauban sa mga traysikad drayber nga gidudahang mga kakunsabo niini sa maong anomaliya ug gibalhug na karun sa bilanggoan.

Matud ni Loot nga natribukar ang maong binuang human nakapakambyo og P8 mil si Chu, duha niini tag P3 mil ug laing usa P2 mil niadtong Biyernes ug human makobra ang maong kantidad nasuta sa accounting office nga peke ang mga dokumentong gigamit.

Subay sa gihimong pagsukit-sukit sa bise mayor nahibaw-an niining ang mga orihinal nga voucher niadtong benepisyaryo nga mahatagan og hinabang pinansyal sa MSWD sa lungsod gipa- xerox ni Chu ug maoy gamiton sa iyang pangilad.

“Iya nang ipa-xerox ang voucher ug ilisan lang ang pangalan dayon manugo siya og mga sikad-sikad driver nga maoy mo-claim sa treasurers office unya hatagan lang niya og tag 200 ang sugoon,” dugang asoy pa ni bise mayor Loot.

Nasuta usab ni Loot gikan sa mga traysikad drayber nga giapil pagdakop nga gisabot sila ni Chu nga hatagan og tag P200 sa matag P3 mil nga cash assistance nga makobra nila sa lungsod gamit ang gipang- Xerox copy nga voucher.

Gumikan niini gipahibalo ni Loot nga di siya magduha-duha sa pagpasaka og kaso batok sa maong kawani tungod kay kaniadto pa siya nakadawat og daghang mga reklamo batok niini apan gumikan sa kawalay ebidensya wala gyud silay nahimo kaniadto.

Si Loot nimando dayun alang sa dinaliang katukoran sa grievance committee nga maoy tahasan pag-imbestigar ug pagpalagpot sa maong kawani.   (BANAT NEWS)