Gipusil sa silingan kay naluoy sa kapuyo ug inahang gikulata

CEBU, Philippines - Usa ka lalaki ang mikulata sa inahan ug anak sa iyang live-in partner gipusil sa ilang silingan diha sa sitio Kabatoan barangay Abuno dakbayan sa Lapulapu kagahapon sa kaadlawon.

 Ang biktima mao si Juanito Bacolong Getizo, 33 residente sa maong dapit human mapusili tulo ka higayon diha sa iyang likod sa kalibre .38 rebolber nga gigamit sa suspek nga si Ronie Cañete Almerol alyas Tata.

 Sa imbestigasyon ni SPO3 Rex Ibañez sa Crime Against Persons (Homicide) sa dakbayan sa Lapulapu nasayran nga si Getizo ug ang live-in partner niining si Beatriz Dayon nagkalalis ug ang silingan nilang suspek kalit nga miabot ug mipusil kang Getizo.

 Si Almerol daling mitahan sa kapolisan human sa maong hitabo ug gidala sa buhatan sa kapolisan. Atol sa pakighinabi sa Banat News, si Almerol mipadayag nga naluoy siya sa kapuyo ug inahan sa biktima tungod sa pagpangulata sa naulahi kanila.

 Matud pa ni Almerol wala siya’y plano pagpusil kang Getizo apan nahibulong kini nganong iyang nakablit ang gatilyo sa maong armas hinungdan nga siya mitahan sa kapolisan.

 Si Almerol anaa karon sa detention cell sa kapolisan sa dakbayan sa Lapulapu samtang si Getizo padayon pang giatiman sa mga doktor ug posibleng operahan kini sa mga bala nga miungot sa lawasniini. (Bong Soriano) (BANAT NEWS)