CEBU, Philippines - Namatay ang usa ka 9 ka bulang batang lalaki samtang naangol ang maguwang niini ug ang iya mismong inahan human maugdaw sa hingpit ang ilang balay sa pagkasunog niadtong Biyernes sa alas 11:00 sa buntag sa barangay Tumalog, lungsod sa Oslob.
Ang namatay giila sa kapulisan nga si James Louie Linejan, 9 ka bulan, samtang naangol gumikan sa mga paso ang iyang maguwang nga si John Lloyd Linejan, 2, ug ang iyang inahan nga si Joan, may bansagong Linejan, 25.
Sa report nga nadawat sa Operation Office sa Cebu Provincial Police Office nasayran nga ang inahan sa duha ka mga bata nanglaba sa sapa nga may gilay-ong 200 metros gikan sa ilang balay niadtong higayona.
Apan nakurat nalang kini dihang ang iyang 4-anyos nga anak nga si Riza Mae , miapas kaniya ug nagpahibalong ang ilang balay nasunog, hinungdan nga mikaratel siya og dagan sa pagpauli.
Pag-abot niya sa ilang balay ang 2-anyos nga si John Lloyd diha na sa gawas, apan ang 9 ka bulan niining manghod nga si James Louie nga iyang gisulod sa duyan nahabilin sa sulod sa balay nga naugdaw na niadtong higayona.
Apan gumikan sa kahingawa, mipugos pa gyud si Joan sa pagsulod sa nagdilaab nga kalayo sa pamasin nga masalbar pa niya ang bata apan wala na niya kini maluwas nga buhi gumikan kay hastang duyan naugdaw na sa kalayo.
Si PO2 Alberto Yray, sa Oslob Police Station nagkanayon nga ang bana ni Joan nga si Luciano wala diha niadtong tungora kay may gitrabaho kini sa ilang barangay.
Matud pa ni PO2 Yray nga dali kaayong miulbo ang kayo ug walay mga silingan nga nakasalbar sa panimalay sa pamilyang Linejan gumikan sa kakalit sa maong sunog ug dali usab kaayong miugdaw sa balay nga ginama sa mga gaan nga mga dapat. Base sa imbestigasyon nga gihimo sa kapolisan , nasayran niini nga ang 2-anyos nga si John Llyod maoy nagduwa-duwa og lighter niadtong higayona ug posibleng naduslitan niini ang mga sinina o kaha mga papel nga daling nasunog sa sulod sa balay.
Midugang si PO2 Yray nga alas 5:00 sa hapon na gipadangat sa mga silingan ang maong hitabo ngadto sa ilang buhatan ug wala na sila makapadala og trak sa bombero ngadto sa maong lugar nga nasunogan.
Hinuon si John Lloyd nakagawas na sa tambalanan ug si Joan nalang maoy kasamtangang nagpa-alim sa iyang mga paso sulod sa hospital. Samtang ang mga opisyal sa lungsod mihatag usab og ayuda sa mga nabiktima ug gani gipaatiman kini karon sa buhatan sa Department of Social Welfare and Development (DSWD) sa maong lungsod. (BANAT NEWS)