3 ka tinun-an dunay influenza A-H1N1

CEBU, Philippines - Tulo sa kapin 70 ka mga tinun-an sa 3rd year ug 4th year high school sa Medellin National High School sa lungsod sa Medellin ang nasutang positibo nga natakboyan sa influenza A(H1N1) virus.

Ang maong report wala hinuon makonpirmar sa Department of Health apan sigun sa report nga midangat sa Operation Branch sa Cebu Provincial Police Office (CPPO) si Insp. Bonifacio Arriesgado, hepe sa kapolisan sa maong lungsod nakadawat og impormasyon niini.

Ang mga tinun-an nga napositibo sa A(H1NI) virus nagpangidaron og 16 anyos nga batang babaye, ug 14 anyos nga lalaki, pulos nagpuyo sa barangay Antipolo, samtang laing usa ka 13-anyos nga tinun-an gihapon sa maong tunghaan napositibo usab sa maong virus kansang mga pangalan gipugngan sa Banat News.

Gikatahong ang mga tinun-an nakasinati og paghilanat hinungdan gipaubos gilayon kini sa medical treatment.

Si Dr. Royland Momongan, municipal health officer sa lungsod sa Medellin mibutyag nga migawas sa laboratory examination sa swab test nga positibo sa maong virus ang tulo.

Niadto pang petsa 20 niining bulana namatikdan nga daghang mga tinun-an sa nahisgutang eskuylahan ang gipanghilantan maong wala una pa-eskuylaha gumikan sa pagdudang duna kini A(H1N1) virus.

Sa pagkakaron padayon pa nilang gidapatan og tambal ang gipanghilantan nga mga tinun-an sa Medellin National High School.

Si Momongan giabagan usab sa mga opisyales sa Department of Health (DOH)-7 ug Provincial Health Office pagpahigayon og contact tracing, apan siya naglibog nganong naabot ang maong virus sa ilang lugar.

Matud ni Momongan nga wala gyu'y history nga mibiyahe sa laing kanasuran ang mga estudyante ug wala say mga langyaw’ng tinun-an nga nagtungha karon sa maong tunghaan.

Samtang si Dra. Lakshmi Legaspi, assistant regional director sa Department of Health (DOH)-7 nagkanayon nga padayon nilang gi-monitor ang kapin 71 ka mga tinun-an sa maong tunghaan tungod sa sunod-sunod nga nagkahilanat ug duna pa napositibo sa maong virus.

Kagahapong adlawa nibalik ang medical team sa DOH-7 gipangulohan ni Dr. Expedito Medalle ug RESU-7 Dr. Renan Cimafranca ngadto sa Medellin National high school tungod kay dunay lima ka mga tinun-an sa mao gihapong tunghaan nga gidudahang natakboyan usab sa maong virus.

Samtang gibutyag usab ni Legaspi nga ila usab karun gipaabot ang resulta sa swab test sa walo ka mga tinun-an gikan sa tulo ka mga tunghaan sa lungsod sa Bogo nga gidudahang natakboyan sa maong kagaw.

Matud ni Legaspi posibleng ipagawas na ang resulta karung hapon o ba kaha sa Lunes sa mga tinun-an sa Bogo nga nakasinati og dungan nga paghilanat.

Matud ni Legaspi duha ning maong mga tinun-an sa publiko ug lain sa pribado apan nagdumili ang doktora pagtug-an sa ngalan niini. – BANAT NEWS