Dealer og drugas nakagawas gikwestiyon

CEBU, Philippines - Gikwestyon ni Gobernador Gwendolyn Garcia ang mga opisyal sa Philippine Drug Enforcement Agency (PDEA-7) nganong nakalingkawas ang usa ka notadong tigpayuhot og ginadiling drugas sa lungsod sa Cordova nga nasikop niadtong nakalabay nga semana sa ilang pagronda.

Matud pa ni Garcia, ang iyang pagkwestiyon gibase lamang sa reklamo ni Mayor Adelino Sitoy tungod kay nabalaka ang mga residente nga mosamot ang problema sa illegal drugs sa ilang lugar.

Ang gobernadora nahadlok para sa mga residente sa maong lungsud nga posibleng hasion sa maong bigtime drug dealer karong nakagawas na kini.

Apan sa iyang bahin si PDEA-7 regional director Randy Pedroso nipasabot nga ang nakuha nilang shabu sa balay sa maong big time drug pusher wala makaabot og lima ka gramo hinungdan nga nakapiyansa kini.Samtang gitataw usab ni Pedroso nga dili siya motuong naguol ang mga residente sa pagkalingkawas sa ilang dinakpan tungod kay sa ilang pagronda nag-people power pa gani sila aron dili kini masikop.

Tungod niini, si Garcia nimando sa paghimo og pagtuon aron ma-review ang provision sa Comprehensive Dangerous Drug Act of 2002 aron mausab kini ug dili na masubli pa ang pagkalingkawas sa maong dinakpan sa Cordova.

Gihagit karon ni Garcia ang PDEA nga magtinarong sa ilang operasyon ug mas palig-unon ang ilang mga operasyon ug matag kasong ilang mapasaka batok sa mga drug suspects aron di makasayon-sayon og piyansa. – BANAT NEWS