Duha ka bata namatay sa Dengue

CEBU, Philippines - Nadugangan og duha ka batang nakalas ang listahan sa Cebu City Health Department sa mga namatay sa dakbayan tungod sa sakit nga dengue sumala pa ni Dorenda Macasucol sa City Epidemiology Surveillance and Statistics Unit (CESSU).

Duha ka bata ang nakalas niadtong Hulyo 24 tungod sa maong sakit usa niini 9-anyos nga batang babaye sa Poblacion-Pardo tungod kay giingong uwahi nang nadala sa tambalanan.

Nagkanayon si Macasucol nga mao usab ang hinungdan nga namatay ang 8-anyos nga batang lalaki gikan sa barangay Carreta.

Tambag karon ni Macasucol ngadto sa mga Sugbuanon nga moduol gilayon sa mga barangay health center kung dunay hilantan sa pamilya.

“Inig kakita nila nga dunay gihilantan sa ilang sakop, dalhon dayon sa health center kay libre baya nang atong konsulta ug CBC platelet counting,” sumala pa ni Macasucol.

Partikular na niini ang mga satellite health centers nga nahamutang sa Punta Princesa, Guadalupe, Parian, Poblacion Pardo, Barrio Luz, Mabolo ug Talamban.

Kini gawas diha sa City Health Department ingon man sa Cebu City Medical Center (CCMC) nga gibutangan og fast lane alang sa dengue suspects.

Sa kinatibuk-an, moabot na sa 523 ang dengue cases nga natala sa CESSU sukad sa buwan sa Enero hangtud niadtong Hulyo 25 diin 13 niini ang nakalas.

Kini mas ubos hinuon kun itandi sa susamang period sa miaging tuig nga dunay 799 ka kaso ug 34 ang namatay.

Taliwa niini miingon si Macasucol nga nagpadayon ang ilang anti-dengue campaign sa dakbayan ilabi na ang pag-edukar sa katawhan ug sa mga tinun-an.

Nagkanayon si Macasucol nga ugmang adlawa, sila mopahigayon og school based pulong-pulong diha sa University of Cebu main campus dayon isunod sa adlaw'ng Biyernes ang sitio Dao sa barangay Talamban. – BANAT NEWS