Guardian mag- mass feeding

CEBU, Philippines - Ang News Guardian Inc. sa Metro Cebu nga gipangulohan ni FRMG Raul “Boy” Ulcar Carin nagpasiugda og raffle draw niadtong miaging adlaw sa tinguha nga makatigom og salapi nga ilang magamit alang sa ilang katilingbanong kalihokan.

Kini ilang gihimo sa sulod sa Gym sa Cogon Ramos nga gitambongan usab sa kagatusan nilang mga sakop gikan sa nagkadaiyang chapter sa kabarangayan sa dakbayan sa Sugbo ug silingang kalungsoran sa lalawigan nga naglakip sa dakbayan sa Talisay ug uban pa.

Ang mga dagkong haligi sa NGI nga sila si ANAD Partylist Representative Pastor “Jun” Alcover ug Kuya Boy David Odilao napakyas hinuon sa pagtambong kay tua pa kini sa kaulohan aron motambong sa State of the Nation Address (SONA) ni Presidente Gloria Macapagal Arroyo.

 Si FRMG Boy miingon nga pipila sa mga katilingbanong kalihokan nga ilang himoon mao ang pagpasiugda og mass feeding alang sa kabataan sa kabarangayan ug lakip na usab ang pasiugda og mga tree panting, pagtabang sa mga biktima sa sunog, baha, landslide ug uban pang katalagman.

Si Bro. Lorie Sajulga nga maoy provincial secretary sa NGI nga nahinabi sa Banat News miingon nga dili lang katuyoan sa NGI ang pag-abag sa kagamhanan alang sa pagpatunhay sa kahapsay ug kalinaw kun dili ang pagpasiugda usab og kalihokan nga makaayo sa katilingban.

Ang mananaog sa maong raffle makadawat og 21 inches nga TV set, sa ikaduhang mananaog mao ang  usa ka sakong bugas nga Ganador, DVD player sa ikatulo ug may tulo ka mga consolation prizes nga mao ang mga pinutos nga grocery nga tag P500 matag usa. – BANAT NEWS