CEBU, Philippines - Mahinayon ang pagpahigayon og random drug test ning semistera alang sa mga tinun-an sa high school ug college dinhi sa rehiyon 7.
Kini maoy giklaro ni Undersecretary Atty. Clarence Paul Oaminal, sa Dangerous Drugs Board (DDB) kinsa miingon nga wala mausab ang schedule sa random drug test niining semistera.
Matud pa ni Oaminal ang DDB, Department of Health, (DOH) ug Commission on Higher Education (CHED) unang mibansay sa mga doktor ug nurses nga mga coordinator sa Visayas ug Mindanao kinsa maoy mahimong sakop sa medical team nga mopahigayon sa random drug test sa mga tinun-an.
Sumala pa ni Oaminal nga wala nay problema sa ilang pagpangandam sa random drug test tungod kay niadtong June 9-10 nahuman na sa pag-training ang nahisgutang mga coordinator.
Midugang si Oaminal, maoy tinguha nila nga ang tanang random drug test sa mga tunghaan sa tibuok nasud karong tuiga isip kabahin sa ilang kampanya sa pag-abag sa mga tinun-an nga malikay sa druga. – BANAT NEWS