Mga priso sa City Jail dunay sintomas AH1N1

CEBU, Philippines - Duna nay pipila ka mga binilanggo sa Cebu City Jail nga   nakasinati og mga sintomas sa A H1N1 flu sama sa hilanat ug uban pa.

Gitataw hinuon ni City Jail Warden Superintendent Efren Nemenio nga seasonal flu lang ang na-eksperyinsya sa mga inmates ug walay angayang kabalak-an.

Wala hinoon isalikway sa jail warden ang posibilidad nga makasulod sa nahisgutang bilangguan ang gikahadlukang sakit.

Kini human usab makumpirmar nga A H1N1 flu virus ang mitakod nga sakit sa mga binilanggo diha sa Mandaue City Jail niadtong miaging semana.

Tungod niini miingon si Nemenio nga hugot niyang gipa-monitor ang mga piniriso sa ilang mga health officer pinaagi sa pagsuroy sa thermal equipment.

Nabalaka ang jail warden nga makasulod sa Cebu City Jail ang nahisgutang virus tungod kay giingong ubay-ubay ang ilang mga inmates.

Miingon si Nemenio nga moabot na usab karon sa 2,020 ang ilang jail population wala pay labot niini ang 127 ka jail personnel. 

Nagkanayon ang jail warden nga iyang ipaihap matag hapon sa nurse-on-duty ang mga binilanggo nga gipanghilantan, gipang-ubo, gipangsip-on ug uban pa.

Matud sa jail warden nga duna silay gihimo nga isolation area diha sa bilangguan nga mahimong temporaryo nga kabutangan sa suspected A H1N1 cases.

Sa pikas bahin miingon si Nemenio nga estrikto usab nilang gidili ang pagpasulod og mga dalaw nga dunay mga sakit sama sa hilanat, ubo, sip-on ug uban pa.

Gitataw sa jail warden nga gawas sa pagpaagi sa mga bisita sa thermal equipment, ipaubos usab kini sa interview aron sa pagseguro.

Midugang si Nemenio nga ila unya dayong kansilahon ang pagpasulod og mga dalaw sa bilanggoan kung dunay bisan usa ka kaso sa A H1N1 flu nga matala sa City Jail. – BANAT NEWS