Lalaki giputlan sa ulo

CEBU, Philippines - Giputlan sa iyang ulo ang usa ka 23-anyos nga lalaki sa iyang mga higalang silingan nga gikainom niini kagahapon sa kaadlawon diha sa may Sitio Kalomboyan, barangay Buhisan ning dakbayan sa Sugbo.

Ang biktima nga giputlan sa iyang ulo giila sa kapolisan nga si Jun Otom Ngoho, 23, nagpuyo sa nahisgutang lugar, dunay kapuyo ug nagtrabaho isip production maintenance. Gitumbok nga suspetsado nga maoy nagpunggot sa ulo iyang silingan nga kainom nga sila si Jose (apelyido gipugngan) 16 anyos ug Ritchie Subkay, 20, nga lumad nga taga Pagadian City   nga duha pa lang ka bulan nga nagpuyo sa nahisgutang barangay.

Si PO3 Geoffrey Gutual, imbestigador sa Homicide Section sa Cebu City Police Office nga gikahinabi sa   Banat News nagkanayon nga ang patay’ng lawas sa biktimang si Ngoho nakit-an sa iyang silingan nga si Celso Canillo, 27, usa ka kargador sa Pasil Fishport mga alas 6 pasado sa buntag kagahapong adlawa.

Matud pa ni PO3 Gutual nga si Canillo padulong nang mopauli niadtong higayuna gikan sa iyang trabaho diha sa Pasil Fishport sa dihang nakurat siya nga nakit-an niya ang patay’ng lawas ni Ngoho diha daplin sa dalan nga nag-ubo nga wala nay ulo.

Gumikan sa iyang kalisang dali niyang gipahibalo ang iyang silingan nga si Elet Devino kinsa maoy mipahibalo sa mga barangay tanod sa Buhisan ug nanawag sa kapolisan.

Sumala pa ni PO3 Gutual nga miresponde didto sa crime scene ang mga sakop sa Punta Princesa Police Station ug ang Car 010 sa Mobile Patrol Group (MPG) ug didto nakit-an ang ulo sa biktimang si Ngoho nga gilabay sa kasagbutan sa bakilid sa nahisgutang lugar mga 15 metros ang gilay-on sa lawas niini.

Atol sa ilang gihimong imbestigasyon didto sa lugar, usa ka Sherly Otor, mitug-an nga mga ala-1:00 sa kaadlawon kagahapon nakamata siya human gipukaw nila Joseph, 17 anyos, Ritchie ug   biktimang si Ngoho sa dihang namalit og ilimnong makahubog ingon man sagol niini sa iyang sari-sari store ug didto nag-inom.

Apan nadunggan niini nga nakadisider ang tulo nga moadto sa disco sa pikas sitio Puso sa nahisgutang lugar. Nag-inom pa kining daan sa panimalay sa ilang silingan nga dunay gipamay-an.

Wala hinuon silay laing na-recover sa crime scene gawas lang sa duha ka paresan sa tsinelas nga itom ug green, botelya sa bino nga katunga nalang ang sulod, pitsel, ug tabon sa bino.

Samtang nakita usab nila nga adunay samad sa walang aping ni Ngoho ingon man sa tuong tudlo   nga posibleng igo sa pagsagang.

Ang duha ka suspek mitahan sa ilang kaugalingon didto sa Punta Princesa Police Station kagahapon sa udto human makonsensiya sa ilang gihimo.

Si PO2 Dario Manatad nagkanayon nga si Subkay miangkon nga maoy miluglog sa liog ni Ngoho human sila maghinambugay sa ilang mga gipamatay.

Si Subkay miangkon nga kutsilyo lang ang iyang gigamit pagluglog sa liog aron mabuwag ang ulo ni Ngoho gikan sa lawas niini, apan dili pa makatuo ang kapolisan tungod kay posibleng migamit kini og sanggot. – BANAT NEWS