Iglesia ni Cristo magrali ugma

CEBU, Philippines - Ang Iglesia ni Cristo (INC) gitakdang mag-rali ugma, Hulyo 27, atol sa state of the nation address(SONA) ni Presidente Gloria Macapagal Arroyo “apan dili rali batok sa gobyerno , kundili rali bahin sa kaluwasan sa kalag sa tawo,” matud pa ni Rene Aligarbes, nagpailang tigpamaba sa maong relihiyon.

Kini maoy tubag ni Aligarbes sa daghang pangutana kun moduyog ba ang INC sa rali sa mga cause oriented groups batok sa charter change (Cha-cha) ug uban pang pamaagi sa kagamhanan sa maong adlaw.

Gani gidapit ni Aligarbes ang tanan nga mosaksi ning rali sa INC diha sa Cebu City Sports Center (CCSC) sa Abellana school grounds ning dakbayan aron hidunggan nila ang mga pulong sa Ginoo.

Gibanabana niya nga mokabat sa 50,000 ka mga miyembro sa INC uban sa mga bisita niini ang magpundok sa tibuok adlaw diha sa CCSC aron ambitan ang pagsaulog sa maong kapunongan sa ika-95 ka tuig nga anibersaryo niini sukad sa pagrehistro niini dinhi sa nasud niadtong Hulyo 27,1914.

Ang maong kasaulogan gipahigayon sa INC sa matag Hulyo 27 matag tuig ug niini pa lang tuiga ideklarar sa kagamhanan nga usa ka special working holiday ang maong petsa sa tibuok nasud, matud pa ni Aligarbes.

Midugang siya nga aduna nay minilyon ka miyembro karon ang INC nga anaa sa 75 ka mga nasud ug kaping 100 ka mga rasa sa tawo ang nahimong sakop niini.

Nagsugod lang sa usa ka tawo ug kasagaran sa mga miyembro niini mga kabus, apan matud pa ni Aligarbes nakapatukod kini og mga kapilya nga dili mominus tag P10 milyones ang kantidad matag tuig.

Gani sumala ni Aligarbes nga sa tuig 2008, nakapatukod ang INC og 91 ka kapilya, diin unom niini didto sa Estados Unidos sa America sa kinabus nga paningkamot sa miyembro niini.

Gibatbat ni Aligarbes nga niadtong pagkamatay ni kanhi Presidente Ferdinand Marcos nagtuo na ang kadaghanan nga dili na makapatukod og kapilya ang INC sa pagtuo nila nga ang mga kapilya niini giabagan sa kuwarta ni Marcos.

Apan dihang nawala si Marcos misamot paglipang ang maong kapunongan uban sa mga mehoras niini dinhi sa nasud ug sa gawas.   (BANAT NEWS)