Giluba buko-buko natuhab

CEBU, Philippines - Natuhab ang buko-buko sa usa ka tawo dihang nasabak kini sa bala sa armas sa giingong mga sakop sa Crips Gang nga miluthang kaniya didto sa barangay Babag II dakbayan sa Lapulapu sa miaging gabii.

Ang biktima mao si Jimmy Dano, 20, ulitawo nga taga Babag II, samtang ang mipusil kaniya mao ang tulo ka mga batan-ong wala hiilhi kinsa giingong sakop sa Crips Gang.

Si PO3 Candido Baringue sa homicide section sa kapolisan sa maong dakbayan miingon nga gikan pa nga nakig-inom sa iyang mga barkada ang biktima.

Nag-inusara kining naglakaw pauli sa ilang balay dihang kalit lamang mitumaw ang grupo ug gikomprontasi ang biktima sa pasangil nga namato kini kanila.

Apan gipanghimakak sa biktima ang maong pasangil nga misangpot sa ilang panaglalis.

Apan samtang naglalis, usa sa tulo ka tawo ang milanit sa iyang armas de fuego nga wala hisayri ang kalibre, ug dihadiha gipusil ang buko-buko sa biktima.

Dihang nakita nila nga misakuong ang biktima sa kasakit sa agi sa bala, misirit dayon kini og panagan pahilayo sa maong dapit.

Gihatod dayon sa mga nakasaksi ang biktima ngadto sa Vicente Sotto Memorial Medical Center sa dakbayan sa Sugbo,-samtang gipangita pa sa kapolisan ang mga criminal. (Romeo T. Limpangog)   (BANAT NEWS)