Kapitol gisaway

CEBU, Philippines – Gisaway sa waste and pollution watch dog ang plano sa lalawigan sa Sugbu pagtambak sa mga abo gikan sa planta sa Korean Electric Power Corp.(KEPCO) diha sa Balili Beach Resort sa lungsod sa Naga.

Sa suwat nga gipadala ngadto sa buhatan nila ni Gobernador Gwendolyn Garcia ug Bise Gobernador Gregorio Sanchez Jr. ang EcoWaste Coalition mipadayag sa ilang dakong pagsupak sa maong plano.

Ang maong dumpsite gilain aron maoy labayan sa mga abo gikan sa gipalapdang 200-megawatt coal power plant sa KEPCO sa lungsod sa Naga nga magsugod og operate sa tuig 2011 bugti sa bayad nga 1 million dolyar ngadto sa Kapitolyo.

Ang EcoWaste Coalition misuporta sa gidusong reklamo sa duha ka abogado dinhi sa Sugbo nga sila si Atty. Gloria Estenzo-Ramos ug Atty. Benjamin Cabrido.

“In the greater interest of human and ecological health, we urge the government of Cebu to apply the precautionary principle, reconsider its coal ash deal with Kepco, prevent a potential chemical crisis that might even cost beyond the US$1 million promised by the company,” sumala pang Manny Calonzo, presidente sa EcoWaste sa iyang suwat ngadto sa Kapitolyo.

Nabalaka ang maong pundok nga basin og magbunga og dakong kadaut sa kalikupan ug sa katawhan ang kemikal nga makuha gikan sa maong mga abo.

Kini gumikan sa nadiskubrehan sa gihimong pagtuon sa Greenpeace Southeast Asia sa ash samples gikan sa coal-fired power plant sa National Power Corp. sa Calaca, Batangas nga positibo sa mercury, molybdenum, nitrates ug nitrites, selenium, boron, cadmium, arsenic ug uban pang toxic chemicals nga makaingon sa mga sakit nga kanser ug uban pa.

Giawhag sa grupo ang Kapitolyo nga sa panahon karon sa climate change angayang mas mosagop sila og mga renewable energy options ug di pinaagi sa fossil fuels sama sa coal fired power plants. – Brenda Batuto (BANAT NEWS)