Bomb scare sa Badian nakaalarma
CEBU, Philippines – Giisa sa heightened alert ug ipakatap sugod kagahapong adlawa ang mga sakop sa Regional Mobile Group (RMG-7) Provincial Mobile Group (PMG) Special Reaction Units (SRU) sa lungsod sa Badian gumikan sa hulga sa pagpamomba niadtong Lunes sa gabii.
Kini maoy gipahibalo ni Sr. Supt. Jesus Gaquing, director sa kapulisan sa lalawigan sa Sugbu human mangayo’g tabang ang mga sakop sa Badian Police Station pag-secure sa ilang lugar.
Hinuon ang hulga mitumaw nga bakak dihang gisusi sa kapolisan apan di buot mokumpiyansa ang director niini sanglit nagsingabot na ang kapistahan sa maong lungsod karong semanaha.
Naputol ang “Search For Banig Queen Festival” ingon man Jingle contest sa lungsud sa Badian nga gitambungan sa liboang tumatan-aw dihang dunay mipahibalong may bomba sa maong dapit.
Ang hepe sa Badian Police Station nga si Insp. Raymond Rodriguez nga gikahinabi sa mga tigbalita nagkanayon nga mga alas 10:00 pasado sa gabii nakadawat sila og text messages sa hotline sa ilang police station gikan sa numero nga 09239733526 nga nanghulgang pa-ulbuhon ang covered court sa barangay Poblacion atol sa festival.
Si Mayor Carmencita Lomain gihunghungan ni Insp. Rodriguez kabahin sa nadawat nga text diha sa ilang police station ug diha-diha bisan wala tug-ani kabahin sa hulga hinay-hinay nilang gihangyo sa pagpapauli sa mga tawo gumikan kay duna sila’y gipangita.
“Good evening chief beware kasi ngayong gabing palabas may bomba daw pasasabugin sa covered court, sa gitna nang palabas, may pasasabugin daw maraming bomba,” matud pa sa texter.
Nasundan kini og laing tulo ka pagpanghulga nga bombahan gihapon ang kalihukan kagahapong adlawa kay nasagmuyo kining wala mahinayon ang plano niadtong Lunes sa gabii.
Naglisod og subay ang kapolisan gumikan kay pre-paid number ang gigamit sa texter. – Guam Logroño (BANAT NEWS)
- Latest
- Trending
