Fratmen sa Tungkop, Minglanilla gipatawag

CEBU, Philippines – Siyam ka grupo sa fraternity ug gangs gipatawag sa kapitan sa barangay Tungkop, lungsod sa Minglanilla aron paapilon sa mga kalihukan sa barangay aron mamentenar ang kahapsay ug kalinaw diha sa ilang lugar.

Si Kapitan Olga Fiel nagkanayon nga iyang nakita nga ang barangay maoy makabenipisyo sa maong paagi ug ang mga residente sa lugar dili usab bation og kabalaka kabahin sa frat wars o sa bisan unsang krimen nga naglambigit sa fraternity.

Matud ni Fiel nga gipatawag na niya ang mga lider sa Tau Gamma Phi, Alpha Kappa Rho, Gamma Phi Sigma, Beta Gamma Rho, Bloods, Crips, Trihedron, KGA (lokal nga grupo nga nagbase diha sa iyang barangay) aron mogama og kasabutan nga dili mopasiugda sa samok ug krimen.

Aron hiusahon ang mga pundok sa mga batan-on gitukod ni Fiel ang “Nagkahiusang Fraternity sa Barangay Tungkop” (NFBT) ug may tahas silang buhaton kini mao ang pagtabang sa mga proyekto sa ilang barangay.

Una nilang trabaho mao ang pagpamintal sa pribado ug publikong mga kural nga kanhi gipanghugaw-hugawan, gipatabang usab sila pag-ilis sa mga suga diha sa kadalanan ingon man ang pagpanglimpiyo ug pagtabang og bantay alang sa kalimpyo, kalinaw ug kahapsay sa Tungkop.

Ang kapitana nga usa usab ka miyembro og fraternity nagkanayon nga giimbitar nila ang Technical Education Skills Development Authority (TESDA) aron mahatagan og skills training ang mga miyembro sa NFBT aron usab sila makakita nag trabaho. – Brenda Batuto (BANAT NEWS)