CEBU, Philippines - Si Undersecretary Lito Ruiz sa Department of Interior and Local Government nagkanayon nga may bendisyon ni Presidente Gloria Macapagal Arroyo ang iyang lakang sa pagkandidato pagkamayor sa dakbayan sa Lapulapu.
Matud pa ni Ruiz nga una mapinalisar kining iyang plano gikonsulta una niya si Presidente Arroyo ug uban pang dagkong tawo sa ikaunom nga distrito gawas sa iyang asawa nga si Kongresista Nerissa Soon Ruiz sa maong distrito.
Giasoy ni Ruiz ngadto sa mga tigbalita nga sa iyang pagduaw ngadto sa Malacanang niadtong miaging semana,gisuginlan niya si Presidente Arroyo nga siya mokandidato pagkamayor sa dakbayan sa Lapulapu ug puwerting lipaya sa Presidente ug misaad kini og lig-ong suporta kaniya.
Busa samtang magmayor si Kongresista Ruiz sa dakbayan sa Mandaue ug siya usab sa Lapulapu dako kaayo og purohan nga molipang ang tanang katawhan sa kahayahay unya sa panginabuhi kun silang magtiayon ang modumala sa duha ka mga dagkong dakbayan sa Metro Cebu, matud pa niya.
Karong nasuta niya nga suportado siya ni Presidente Arroyo, gusto niyang mahimo niyang bise mayor ang negosyante nga si Efrain Pelaez.
Gituohan ni Ruiz nga magbansiwag sila sa kadaugan tungod kay nakita nila karon ang pulso sa taga Mandaue ug Lapulapu nga anaa gayud kaniya ug sa iyang kapikas nga si Kongresista Ruiz sa pagdumala sa maong mga dakbayan. - Chester Abadilla (BANAT NEWS)