CEBU, Philippines - Patay ang usa ka dispatcher nga gipusil sa duha ka lalaking nagsakay og motorsiklo alas 7:50 ang takna sa miaging gabii sa Ibabao Estancia, dakbayan sa Mandaue apan usa sa mga mamumuno ang nadakpan sa kapolisan.
Ang dispatser nga gipatay mao si Rockly Sinda, 25, taga sitio Cantobol, barangay Maguikay ug giila usab ang suspetsadong nadakpan nga mao si Melchor Macarayan Sitenta Jr., 26, taga Perez Compound sa barangay Alang-Alang sa maong dakbayan.
Si Macarayan nadakpan sa grupo ni Insp. George Aniñon atol sa hot pursuit operation diha sa panimalay niini sa barangay Alang-Alang human motakdo ang dagway niini sa rogues gallery nga maoy gitumbok nga mipusil kang Sinda.
Nakuha diha sa crime scene ang mga kabhang sa kalibre .45 nga bala nga gigamit sa mga suspetsado nga pagpusil sa biktima.
Si Aniñon, hepe sa Homicide Section sa Mandaue City Police Office (MCPO) mitug-an nga nanawag niadtong tungura ang biktima og mga pasahero dihang gihunungan sa mga mamumuno ug way daghang pangutana gipusil makadaghan si Sinda.
Ang biktima gidali pagdala sa Mandaue City Hospital apan gideklarar kining patay na.
Si Macarayan maoy gitumbok sa mga testigos nga maoy angkas sa motorsiklo ug maoy mipusil kang Sinda.
Gisusi na karon ni Aniñon kung may kalambigitan sa pagpusil patay kang Engr. Antonio Sanchez diha sa Tabok, Mandaue nga gitulis ug gipusil usab nagluwan og motorsiklo. – BANAT NEWS