2 ka empleyado sa Lto positibo

CEBU, Philippines - Duha ka empleyado sa district office sa Land Transportation Office (LTO) nga nahimutang sa Natalio Bacalso Avenue positibo nga tiggamitan og ginadiling drogas base sa resulta sa gipahigayong surprise random drug test niadtong Sabado diha sa ilang rehiyonal nga buhatan.

Si LTO-7 assistant regional director Edgar Catarungan mikompirmar niini ug miingon nga ang duha nila ka empleyado napositibo segun sa inisyal nga resulta sa maong kinalitkalit nga drug test.

Matud ni Catarungan mipatawag siya og regional briefing sa tanang casual employees sa ilang 19 ka division offices sa tibuok Cebu apan ang mga partisipante walay ideya kun duna bay kinalit-kalit nga drug test niadtong Sabado.

Mokabat sa 120 ka mga empleyado ang ilang gipatawag ug sa dihang nangabot na ang tanan wala na nila kini tugoti pang makagawas sa ilang buhatan.

Matud ni Catarungan mipahigayon sila og kinalit-kalit nga random drug test tungod sa hangyo gikan sa mga division heads nga mopahigayon sila og drug test sa tanang mga empleyado.

Apan giklaro hinuon ni Catarungan ang drug test ila gyud kining himuon tungod kay tipik kini sa ilang refining program sa higayon nga mo-expire na ang kontrata ug gikinahanglan sila i-renew ipailawom una sila sa random drug test.

Si Catarungan mismo maoy nangunay pagdala sa mga drug testing kits diha sa ilang buhatan ug nanawag siya og accredited drug testing company aron makaabag kanila.

Iyang gipasalig kun ang duha ka empleyado ma-positibo sa confirmatory test, dili na nila i-renew ang ilang mga kontrata.

Matud ni Catarungan ila kining gihimo gumikan sa hugot nilang kampanya pagpakigbatok sa ilegal nga drugas kay nag-alagad sila sa usa ka buhatan nga iya sa gobiyerno.

Samtang sa laing bahin, ang tanang deputized agents sa LTO-7 gipanawagan nga i-uli ang ilang Identification Card ngadto sa ilang tagsa-tagsa ka division heads.

Matud ni Catarungan ilang gitagalan og lima ka adlaw ang tanang deputized agents pag-uli sa ilang I.D ngadto sa ilang mga labaw aron ila usab masumiter ngadto sa buhatan ni DOTC Assistant Secretary Arturo Lumibao kinsa maoy mikanselar sa tanang deputation lukop nasud nga maka-isyu og Temporary Operators Permit (TOP). – BANAT NEWS