CEBU, Philippines - Patay ang usa ka tawo nga biktima sa pagpanunggab sa iyang silingan sa Vistamar sa sitio Soong, barangay Mactan, dakbayan sa Lapulapu alas 6:30 ang takna sa buntag kagahapon.
Ang namatay mao si Norman Agosto, 29, ug ang gitumbok nga suspetsadong nanunggab mao si Charlie Impas, nga iya rang silingan sa maong dapit.
Sa imbestigasyon ni SPO3 Rex Ybañez sa homicide section sa maong dakbayan nga naglakaw ang biktima pauli sa ilang panimalay gikan sa panimalay sa iyang igsuon niadtong tungura.
Ug samtang naglakaw kalit kining gihansakan sa tiyan sa suspetsado sa gidalang kutsilyo makadaghang higayon hinungdan sa pagkaangkon niini og daghang samad dinunggban nga nakaingon sa kamatayon niini.
Human sa maong pagpanunggab ang suspetsado dali usab nga misibat pahilayo sa maong dapit ug padayon pa nilang gipangita.
Si SPO3 Ybañez miingon nga gikalalis sa biktima ang suspetsado sa miaging adlaw ug gituuhang nagdumot ang naulahi. – BANAT NEWS