80 ka balay naugdaw sa Mabolo ug Subangdaku

CEBU, Philippines – Gibana-banang 80 ka mga panimalay ang naugdaw human miigo ang sunog mga ala s 4:31 diha sa sitio San Isidro barangay Mabolo dakbayan sa Sugbu ug sitio Sapa-Sapa barangay Subangdako dakbayan sa Mandaue.

Ang hepe sa Cebu City Fire Department Supt.. Ismael Codilla miisa sa alarma ngadto sa Task Force Alpha gumikan sa mga kabalayan sa maong lugar nga ginama lang sa mga light materials.

Si Codilla mibutyag nga ang maong sunog nakontrolar sulod sa 39 minutos inabagan sa mga fire volunteers ug kabumberuhan sa dakbayan sa Mandaue ug mga kasikbit nga lugar.

Wala pa matino ang danyos sa maong sunog atol ning pagsulat sa balita.

Gumikan sa kalisod sudlon ang lugar gisumpay-sumpay sa mga bombero ang walo ka fire hoses, apan bisan paman niini dali gihapong mikatap ang kalayo sa mga panimalay daplin sa sapa, wala hinuoy bisan usa ka kinabuhi nga nakalas..

Usa ka Lita Mandaue residente sa nahsigutang lugar nga nahinabi sa mga tigbalita mibutyag nga ang sunog didto magagikan sa panimalay sa usa ka Avelino Tolingin.

Gikatahong ang 4-anyos nga anak nga lalaki niini ug 3-anyos nga anak babaye nagduwa-duwag posporo sa ikaduhang andana ug mao nalay ilang nakita nga kalit nang niulbo ang bagang aso ingon man kalayo.

Apan si Avelino wala sa ilang panimalay gumikan kay nipauli kini didto sa lungsod sa Medellin, hinuon ang mga sakop sa kabomberuhan pabilin pang ni-imbestigar labot sa maong impormasyon. – Guam Logroño (BANAT NEWS)