Sakop sa MMT mitingog na's isyu

CEBU, Philippines – Gibuak na ang pagpakahilom sa usa ka sakop sa Mayor’s Management Team (MMT) nga gilambigit sa kinabuhi ni Cebu City Councilor Edwin Jagmoc.

Sama kang Jagmoc, kusganon usab nga gihimakak sa 23-anyos nga si Misty Majistrado ang taho nga siya nakigrelasyon sa konsehal.

Alang kang Majistrado, nasaypan lang ang ilang panagsuod ni Jagmoc tungod kay kanunay silang magkauban bisan sa adlaw nga Sabado.

Kini tungod kay giingong pulos sila aktibo sa mga programa sa kagamhanan sa dakbayan sama sa Solid Waste, Composting ug uban pa.

Giangkon hinuon sa dalaga nga gipakigkitaan siya sa konsehal ug sa asawa niini nga si Gina sa iyang boarding house diha sa Urgello pipila ka buwan na ang nakalabay ug nahitabo ang pagsinukliay og mga pulong.

Apan gitataw ni Majistrado nga walay balde nga nanglupad sukwahi sa gipalakaw nga estorya nga gilabay ni Gina ang konsehal.

Gani miingon siyang human sa ilang panag-atubang ni Gina ug sa konsehal kanunay na siyang imbitahon sa duha sa pagpanglakaw ug sa pagpangaon.

Gipadayag ni Majistrado nga siya labaw nga naapektahan sa migawas nga report ug wala pa maka-recover hangtod niining higayona.

“How I wish nga mahunong na siya (isyu) kay inig lakaw nako diha daghan kaayong nagtan-aw. Unsa man ni oy, dili na ko ganahan nga molakaw kay wala na koy ulo, daghan sab kaayo nga estorya ba nga moingon nga grabiha anang bayhana oy, wala may delicadeza, nagsige na gyud ko og hilak since Friday paggawas sa balita,” sumala ni Majistrado.

Ang dalaga mao usab ang Development Administration Head sa Planning Office sa City Hall nagkanayon nga dili kalikayan nila sa konsehal nga magkauban sa gimbuhaton kay giingong managsama ang ilang trabaho nga may kalabutan sa pagpakabana sa kalikupan. Sa usa ka press conference kagahapong adlawa, subling gipadayag ni Jagmoc ug sa iyang asawa nga dugay ra nga nahilot ang maong problema.

Gani gipadayag ni Gina nga wala na siya’y pagduda sa kaligdong sa iyang bana nga usa usab ka lay minister ug mainiton gihapon kining nagmahal kaniya. – Elly Bolonos (BANAT NEWS)