CEBU, Philippines - Pag-umangkon sa giingong druglord nga naluwas sa mga polis gikan sa pagkagaid sulod sa panimalay sa iyang uyoan mibiya gikan sa police station sa Talisay nga walay pananghid sukad pa niadtong Biyernes sa buntag.
Kahinumduman nga si Joel Rhey Basay nga mipasaka og kaso batok sa uyoang si Marino “Hinok” Lawis ug tulo ka mga kaubanan human siya gidagit ug gi-torture sa grupo sa pagdudang gitambling niya ang halin sa illegal nga drugas nga negosyo ni Lawis. Human mapasaka ang kaso gitanyagan si Basay nga anha lang una kini papuy-on sa Talisay police station alang sa iyang seguridad gumikan kay nagtuo ang mga polis nga posibleng dunay dautang mahitabo kaniya.
Si Supt. Henry Biñas, hepe sa Talisay City Police Station nagkanayon nga sa pagbalik niya niadtong Sabado gikan sa iyang leave wala na niya maabti si Basay. Giklaro hinuon niining di nila mapugos si Basay pagpabilin diha sa ilang buhatan gumikan kay usa kini ka private complainant apan buot niyang dunay imbestigasyon nga himuon nganong mibiya kini.
Nagplano unta si Biñas nga mapaubos sa witness protection program si Basay.
Niadtong milabay’ng semana naduso na diha sa piskaliya sa dakbayan sa Talisay ang kasong serious illegal detention nga gipasaka ni Basay batok kang Lawis. - Brenda Batuto (BANAT NEWS)