CEBU, Philippines – Patay ang usa ka mekaniko human kini madat-ogi og bulldozer didto sa Zone Paliya barangay Paknaan, dakbayan sa Mandaue sa milabay’ng buntag.
Ang mekaniko mao si Danilo Abellare, 52, minyo ug residente sa Sitio Sto. Niño dalan Sabellano barangay Pardo, dakbayan sa Sugbo ug kawani sa Cebu Injecto.
Base sa pasiunang imbestigasyon ni SPO3 Edgar Pasaylo sa kapolisan sa Station 3 sa Mandaue City Police Office nasuta nga si Abellare gi-hire sa Cebu Titan Surplus gumikan kay naguba ang ilang bulldozer.
Ang bulldozer nga dugay nang nagyaka gumikan sa palyadong injection pump niini ug ang ligid nga caterpillar gitangtang kini ug igo lamang gibangilan alang sa pagbarog.
Atol sa pagpanukiduki dinhi ni Abellare makina sa maong bulldozer, gisugo sa mekaniko si Dario Caliñada nga kaubang mekaniko sa pagpaandar sa makina niini.
Sa dihang miandar mi-vibrate og maayo ang makina nga maoy hinungdan sa pagkahugno sa bangil niini ug nadat-ogan si Abellare sa mga yantas sa maong ligid sa buldozer.
Katunga sa lawas ni Abellare nadat-ugan ang hinungdan nga gidali kini'g ugkat ug gidala sa Cortes General Hospital ug gibalhin sa Chong Hua Hospital apan duha ka oras kapin sa pagsuway og luwas sa kinabuhi niini nakabsan gyud sa iyang kinabuhi.
Matud pa ni Diomedes Magayon, ang mekaniko sa Cebu Titan Surplus iya nang gipasidan-an si Abellare nga mas maayong tangtangon una ang injection pump sa maong makina una pa kini ayuhon. Apan nagdumili si Abellare sa pagsanong niini gumikan kay alang kaniya maayo nga anaa ra gihapon sa makina ang maong pump samtang mag-ayo siya niini. – BANAT NEWS