Mananagat nag-rally sa Talisay

CEBU, Philippines – Grupo sa mga mananagat sa barangay Tanke ug San Roque, dakbayan sa Talisay naningil na sa pasalig sa siyudad nga financial assistance nga P320 mil.

Ang Pundok sa Gagmay'ng Mananagat sa Sawsawan, San Roque, San Rafael, Salvador, Rattan ug Kalinaw (PGMS) uban sa Sanlakas ang nagtapok diha sa atubangan sa city hall niadtong Lunes ug naningil kang Mayor Socrates Fernandez sa gisaad niini.

Ang Sawsawan sitio kini sa barangay San Roque samtang ang San Rafael, Salvador, Rattan ug Kalinaw mga sitio sa barangay Tanke nga mga coastal mga lugar sa Talisay kansang panginabuhian sa mga molupyo mao ang panagat.

Si Esperanza Cabando, 54-anyos, taga sitio Sawsawan ug presidente sa PGMS sa pakighinabi niini sa Banat News mibutyag nga 336 ka pamilya sa mananagat ang naapektahan sa gitukod nga fish port diha sa barangay Tanke.

Niadtong tuig 2005 ang mayor mipasalig kanila pinaagi sa Memorandum of Agreement (MOA) nga hatagan og financial assistance ang apektadong mananagat ug fish vendors sa katukuran sa fishport diha sa Tanke.

Matud ni Cabando nga niadto gitanyagan sila sa siyudad gamit sa ilang panginabuhi-an sama sa sakayan, pukot ug pagpamuhi og mga baboy nga pulos walay natuman.

Buot sa mga mananagat nga gamiton ang madawat nga salapi pagtukod og kooperatiba nga ilang kapangabuhian.

Si Talisay City Administrator Richel Bacaltos human sa pakig-dialogue sa PGMS mibutyag sa Banat News nga nalangan pagsumitir ang mga mananagat sa ilang mga rekisitos ug naabtan na hinuon kini og bag-ong patakaran sa Commission on Audit (COA) kabahin sa paghatag og financial assistance ngadto sa mga non-government organization (NGO).

Kinahanglan kompleto ang financial report sa grupo nga maoy basehan sa 20 porsiyentong mahimong mahatag sa dakbayan nga sa pagsuma-total P160,000 lang ilang madawat ug dili P320,000 tungod kay wala man makaabot ang ilang pundo sa 20 porsiyento sa P320,00.

Matud ni Bacaltos nga nagkinahanglan og sobra sa P60 mil ang pundo sa grupo aron makuha ang P320 mil, ang grupo duna ray P39 mil, giklaro niyang di mobalibad ang siyudad sa paghatag og financial assistance apan kinahanglang subay sa balaod. – BANAT NEWS