Ulo nabuak utok tuasik

CEBU, Philippines – Nabuak ang ulo ug mituasik pa ang utok sa usa ka motorista human mosampak ngadto sa cargo truck nga miliko paingon ngadto sa FF Cruz gikan sa dalan Ouano Ave. sa sitio Tribunal, barangay Centro, dakbayan sa Mandaue alas 9:10 ang takna kagahapon sa buntag.

Ang biktima nga kritikal ang kahimtang mao si Elmer Mullion, 43, taga dalan Laurente sa barangay Tejero, dakbayan sa Sugbo nga sakay sa iyang motorsiklo gikan sa dakbayan sa Sugbo paingon unta sa dakbayan sa Lapulapu dihang nadasmagan sa cargo truck nga nagdala sa plate number UNG 440.

Si PO2 Ruben Sardena, imbestigador sa traffic section sa Mandaue City Police Office (MCPO) miingon nga ang drayber sa trak nga si Ricardo Muingito Torrimotsa, 41, taga Palma compound sa barangay Opao sa maong dakbayan nisubay sa dalan Ouano Ave. gikan sa barangay sa dalan Plaridel paliko sa FF Cruz dihang kalit nga gibanggaan sa motorsiklo sa biktima.

Matud pa ni PO2 Sardena nga kusog ang dagan sa biktima ug wala kini makakontrol hinungdan nga misampak kini sa luyong ligid sa trak ug naumod pa ang nawong ug ulo ngadto sa gikargang container van.

Si PO2 Sardena nagkanayon nga walay suot nga helmet ang biktima pagkahitabo ug gituohang ang pagkapakong niini og kusog maoy nakaingon sa kadaot sa ulo niini.

Mitahan dayon sa iyang kaugalingon si Torrimotsa sa Presinto 1 sa Centro Police Station alang sa pagpasaka og kaso. – Romeo Limpangog (BANAT NEWS)