CEBU, Philippines – Kapolisan sa dakbayan sa Talisay mipagawas na sa cartographic sketch sa duha ka suspetsadong tulisan nga mipatay sa 20-anyos nga nursing student sa Cebu Normal University nga si Dennis Krisstofer Bago.
Kini gibase sa paghulagway sa usa ka batan-ong dinakpan nga si Jessie Largo, 19, taga sitio Bahadas, barangay Tabunok nga gidakop nila ni PO2 Roelito Tano ug PO1 Jundave David tungod sa pagdala og kalibre .38 nga revolver nga dunay upat ka buhing bala niadtong Martes.
Si Bago ang gitulis sa duha ka mga lalaki ug usa niini ang mipusil kaniya diha duol sa ilang balay sa Victoria Village, barangay Tabunok, dakbayan sa Talisay sa milabay’ng Domingo.
Si Supt. Henry Biñas, hepe sa Talisay City Police Station mibutyag nga nakadawat sila og taho nga may kalambigitan si Largo sa maong tulis.
Apan dihang nahinabi sa Banat News si Largo mihimakak kini sa kalambigitan ug mihingalan nila ni Puppy Antik ug Jun-Jun Avila nga maoy mitulis ug mipatay kang Bago.
Matud pa ni Largo nag-inom sila sa duha diha sa basketball court sa Bahadas ug miangkon ang duha nga sila’y mitulis ug mipusil sa maong tinun-an gumikan sa paglugnot niini ug pagdumili paghatag sa iyang cellphone. – Brenda Batuto (BANAT NEWS)