CEBU, Philippines – Nagtingkagol sa Dumanjug detention cell ang usa ka 46-anyos nga amahan human masakping mipatong sa 12-anyos niyang anak nga dalagita samtang nangatulog sa ilang balay.
Gumikan sa pagkasakop kaniya nakakuha og kaisog ang dalagita sa pagsumbong sa gibuhat kaniya sa iyang amahan sayo ning bulana.
Ang pagpanglugos gikatahong nahitabo duha ka higayon niadto pang Hunyo Uno ug Hunyo otso sulod sa ilang balay nga nahimutang sa usa sa mga barangay sa nahisgutang lungsod.
Si Senior Inspector Ricardo Nayne, hepe sa Dumanjug Police Station sa pakighinabi niini sa Banat News kagahapon nagkanayon nga ang biktima ang wala mosumbong sa iyang inahan sa gibuhat sa iyang amahan ngadto kaniya kay gihulga kining “punggutan sa li-og” kun mosumbong.
Matud ni Nayne nga kagahapon sa kaadlawon nasakpan sa inahan sa biktima nga ang suspetsado mipatong ngadto sa iyang anak ug gituohang padulong na usab molugos niini hinungdan sa nahitabong komprontasyon.
Tungod sa pagsukit-sukit sa inahan ngadto sa dalagita misumbong kini sa pag-unay og among-among kaniya sa iyang amahan.
Ang biktima uban sa iyang inahan ang miadto sa police station sa lungsod ug misumbong sa mga polis sa nahisgutang hitabo ug mipadakop sa suspek.
Si Nayne nagkanayon nga gikatakdang pasakaan og kasong incest rape ug kalapasan sa Akta Republika 7610 kon “Child Abuse” karong Lunes ang suspek. – Brenda Batuto (BANAT NEWS)