Huwes nga naghupot sa kaso ni Joavan pa-inhibiton ni Piskal Rubia
CEBU, Philippines – Gitun-an sa Talisay Prosecutors Office ang pagpa-inhibit sa huwes nga naghupot sa kasong two-counts of serious illegal detention batok sa anak sa mayor sa dakbayan sa Talisay nga si Joavan Fernandez.
Matud pa ni Talisay City Prosecutor Marcial Rubia nga ila nang gitun-an ang pagpa-inhibit kang RTC Branch 22 Judge Manuel Patalinghug.
Si Patalinghug mitugot nga makapiyansa si Joavan Fernandez og P200 mil kay huyang ang ebidensiya sa kasong gipasaka batok sa maong suspek.
Apan gitataw ni Rubia nga ang siguradong himuon sa iyang buhatan mao ang pagduso og motion for reconsideration human nila hingpit nga nadawat ang kopya sa release order ni Judge Patalinghug niadto pa lamang sa adlaw nga Martes.
Kini aron mahayagan ang huwes nga sayop ang pagpagawas niini sa akusado nga anak ni Mayor Socrates Fernandez.
Si Rubia nipasabot nga wala pa mahuman ang hearing sa kaso ug dili mahimong gamiton sa depensa ang dismissal order sa huwes aron pagpa-dismiss sa kaso batok ni Joavan Fernandez.
Iya usab nga gitataw nga bug-at kaayo ang ilang ebidensiya tungod kay ang ilang testigos nga si Osbert Abellana mao mismo ang biktima, si Abellana gipaubos na sa ilang buhatan sa Witness Protection Program.
Gitataw ni Rubia nga nasobrahan lamang sa ka-excited ang kampo ni Joavan Fernandez tungod sa release order sa huwes hinungdan nga mihangyo dayon kining ipa-dismiss ang kaso. – Chester Abadilla (BANAT NEWS)
- Latest
- Trending
