CEBU, Philippines – Gikatakdang mogamit ang Police Regional Office-7 sa mga high-tech nga ekipo ug pasilidad sa University of the Visayas Criminology laboratory alang sa mga dinaliang pag-eksamin sa mga ebidensya ug uban pang gikinahanglang buhaton alang sa kasulbaran sa krimen.
Kagahapong adlawa nagpinirmahay sila si PRO-7 director, Chief Supt. Lani-O Nerez ug UV vice president for administration Gerald “Didi” Gullas sa memorandum of agreement alang sa maong katuyoan.
Sa maong kasabutan, ang mga sakop sa PNP Crime Laboratory ug PRO-7 mahimong makagamit sa mga state of the art nga mga kahimanan sa laboratoryo sa Criminology Department sa UV.
Si Gullas misanong sa maong lakang pagtabang sa kapulisan dinhi sa rehiyon nga mapadali ang pag - examine sa mga chemist ug mga personnel sa PNP Crime Laboratory ang mga ebidensyang makuha may kalambigitan sa mga krimen.
Si Gullas miingon nga ang maong laboratoryo nabuksan niadto pang milabay'ng tuig, kini maoy labing modernong laboratoryo alang sa crime scene investigation dinhi sa Sugbu.
Si Nerez sa iyang bahin mipahibalong problema nila sa PNP Crime Laboratory 7 ang mga ekipo tungod kay dunay mga panahon nga ilaha pa kining ipadala sa Manila o sa ubang rehiyon gumikan kay wala niini ang maong laboratoryo.
Ang UV dunay kumpletong digitalized equipment sama sa Forensic Digital Comparator diin dili lang magamit sa ballistic examination kundili magamit usab sa uban pa. – Guam Logroño (BANAT NEWS)