CEBU, Philippines - Mag-uban karong buntag si Dangerous Drugs Board (DDB) Undersecretary Clarence Paul Oaminal ug Police Regional Office (PRO-7) Chief Supt. Lani-O Neres sa pagduaw sa mga unibersidad dinhi sa dakbayan sa Sugbo.
Ang maong lakang gitumong sa kadagkuan sa DDB ug PRO-7 alang sa pagbukas sa klase sa tanang tunghaan dinhi karong adlawa nga mahatagan og tip ang mga tinun-an kabahin sa problema sa ilegal nga drugas ug kriminalidad.
Si Oaminal nga gikahinabi sa Banat News nagkanayon nga tumong nila ang pagpakigtabo sa administrasyon sa mga unibersidad nga mapadangat sa DDB ang ilang lakang pagpatuman sa anti-drugs program, samtang si Neres, mo-briefing usab sa mga administrador kabahin sa security arrangement sa mga tunghaan.
Matud pa ni Oaminal nga gusto siyang mapadangat personal ngadto sa mga administrator ang ilang schedule sa anti-drugs program sa DDB sa mga tunghaan dinhi sa rehiyon.
Sumala pa niini nga ilang sabutan petsa sa sunod bulan ang pagpatuman sa unang random drug test sa mga tinun-an lukop nasud diin anhi sa rehiyon 7 magsugod karong tuiga.
Gipasabot niini nga nahan-ay na hinuyon ang maong lakang ug napadala na ang mga drug testing kit ug ang tukma nalang petsa sa sunod bulan maoy ilang sabutan ug ang pagpili sa 10 ka mga tinun-an sa kolehiyo sa matag unibersidad.
Si Neres nagtinguha usab nga ilang mabungkag ang dagkong sindikato sa drugas dinhi sa rehiyon 7 hinungdan nga dunay programa ang PNP ug DDB ug ubang mga ahensya sa gobyerno. - Guam Logroño (BANAT NEWS)