CEBU, Philippines – Usa ka lalaking gipasanginlang mihubog ug misuway og lugos sa usa ka ginang apan naabtan dayon nakulatahan ug nabunalan og bugsay, napalgang patay pagkabuntag diha na sa baybayon sa sitio Radar sa barangay Babag sa dakbayan sa Lapulapu kagahapon sa buntag.
Ang suspek nga bana sa ginang nga buot untang lugoson mitahan ngadto sa barangay hall sa Babag giilang si Reynard Pungasi, 30, residente sa maong dapit nga usa ka glass installer.
Si Pungasi mitahan sa barangay human masayring namatay ang gikasumbagay niya nianang milabay’ng gabii nga si Eulogio Muñez Jr. alyas Dongkoy, 32, minyo ug lumad nga taga barangay Guadalupe lungsod sa Bogo
Matud pa ni Pungasi sa pakighinabi sa Banat News naaktohan niya si Muñez nga nagpatong na sa iyang asawang hubog na kaayo niadtong tungora diha sa usa ka fishpond sa nahisgutang lugar.
Sumala pa niya nga pag-abot niya sa ilang balay gisuginlan nalang siya sa mga kabanay nga nagkuyog ang iyang asawa sa mga higalang mga minyo uban ni Muñez nanag-inom diha sa fishpond. Gumikan niini giapas niya ang asawa apan nasugatan nalang niya ang mga kainom sa asawa nga padulong nang mopauli maong iyang gipangutana kun hain na ang iyang kapikas ug nahibaw-an nalang nga tua pa kini sa ilang giimnan uban kang Muñez.
Sa iyang pag-abot sa lugar nakugang nalang siya nga nagpatong na si Muñez sa iyang asawa hinungdan nga iya kining gihamagan ug nahitabo ang ilang sinukmagay, giingong nakapunit og bugsay si Muñez ug gipusposan si Pungasi apan wala kini maigo.
Pangangkon pa ni Pungasi iyang nailog ang bugsay ug gisumbalik niya kini og hapos ngadto kang Muñez tumong sa ulo hinungdan nga giingong mikaratel ug milangoy sa dagat ang naulahi palayo kaniya.
Sa pagtuong miikyas na ang misuway og lugos sa iyang asawa gidala ang kapikas balik sa ilang balay ug kagahapon sa kaadlawon sayo kaayo siyang misulod sa trabaho, diha nalang niya hisayring napalgang patay si Muñez human mapagya sa balita sa radio pag-uli na niya sa ilang balay.
Gumikan niini daling miadto si Pungasi sa barangay hall sa Babag aron pagtahan ug gikuha usab kini sa mga polis alang sa imbestigasyon.
Nagduda si Pungasi nga gituyo og hubog ni Muñez ang iyang asawa aron iya kining pahimuslan, sumala pa niya bag-o lang nila nakaila si Muñez ug wala usab siya makabati nga duna kini relasyon sa iyang kapikas. Si SPO2 Rolito Jumao-as sa Crime Against Persons sa kapolisan sa Lapulapu mibutyag nga posibleng ang pagbunal ni Pungasi og bugsay sa ulo ni Muñez maoy nakaingon sa hinanali niining kamatayon samtang nagpalayo pinaagi sa paglangoy diha sa lawod sa dagat. Si Muñez napalgang patay kagahapon sa buntag nga naglutawlutaw sa maong dapit nga adunay bun-og sa kalawasan. – Bong Soriano (BANAT NEWS)