Iskolar sa Lalawigan maka-college na
CEBU, Philippines – Hayag nang makatungha sa kolehiyo ang mga utukan apan kabus nga mga tinun-an gikan sa lalawigan sa Sugbu human magpinirmahay sila si Cebu Governor Gwendolyn Garcia ug ang Cebu Normal University ug Cebu State College of Science and Technology og memorandum alang sa maong tinguha.
Si Garcia maoy mirepresentar sa probinsiya sa Sugbu samtang si Dr. Marcelo Lopez sa CNU ug Dr. Isaias Villanueva sa CSCST atol sa pinirmahay.
Lakip sa mitambong mao sila si Vice Gov. Gregorio Sanchez, Commission on Higher Education kon CHED-7 director Candelario Aytona ug Department of Education kon DepEd regional director Ricarido Borgonia.
Si Garcia nagkanayon nga ang scholars sa makatungha sa CNU ug sa CSCST nga libre sulod sa upat ka tuig ug makadawat pa kini og usa ka libo ka pesos nga allowance matag bulan.
Gawas niini, ang maong mga scholars mahimo usab nga makatrabaho atol sa tingbakasyon pinaagi sa programa sa probinsiya ug sa Department of Labor and Employment kon DOLE.
Sa iyang bahin, si Sanchez nagkanayon nga maayo ang programa sa probinsiya kay naghatag man kini og panahon ngadto sa mga kabos nga utukan makapadayon sa ilang pagtungha sa kolehiyo bisan pa man sa taliwala sa krisis. – Chester Abadilla (BANAT NEWS)
- Latest
- Trending
