Armas sa gipatay nga polis na-recover

CEBU, Philippines – Gipresentar kagahapon adlawa ngadto sa media ang armas nga giingong service firearm sa gipatay nga si PO2 Benjamin Racaza sa dakbayan sa Talisay. Matud pa ni Cebu City Police Office director Patrocinio Comendador ang maong armas kinuha nila sa tawong gibaligyaan sa suspetsadong si Anthony Aves alyas Tonton.

Si Aves mipusil patay kang Racaza diha sa barangay Dumlog sa dakbayan sa Talisay niadtong Hunyo 6.

Ang mismong tawong gibaligyaan ni Aves sa maong armas maoy mitawag sa kapolisan nga naa niya ang armas nga 9 millimeter pistol ug kini giingong kagahapon pa sa kaadlawon gibaligya kaniya sa suspek. Sa pakisusi nila sa maong armas ilang nasuta nga gi-tampered na ang serial number niiini ug ang kolor imbes nga itom nahimo na nga silver.

Ang maong armas giturn-over ngadto sa PNP Crime Laboratory aron ipa “macro-etching.”

Sa pagkakarun ang kapolisan sa Cebu City nakig-alayon na sa Talisay police sa pagpangita kang Aves. – Lesley Caminade (BANAT NEWS)