CEBU, Philippines – Gi-demolish kagahapong adlawa ang unom ka mga panimalay diha sa Cabancalan 1, barangay Bulacao ning dakbayan sa Sugbo.
Kini tungod usab sa pagmagahi sa mga tag-iya niini pagpahawa sa ilang nahimutangan taliwala sa notisya nga gipadala ngadto kanila.
Ang demolisyon gipasubay usab sa hangyo sa mga opisyal sa barangay Bulacao nga gusto nang mogamit sa luna nga gitukoran sa mga squatters.
Nasayran nga planong tukoran og satellite market sa nahisgutang barangay ang gi-okupahan sa apektadong mga molupyo.
Wala hinuoy pagsupak ang mga squatters sa gipahigayong demolisyon sa mga sakop sa Squatters Prevention Encroachment and Elimination Division (SPEED).
Matud sa operations chief sa SPEED nga si Gil Vega nga naghinay-hinay na usab karon pagpangita og laing kapuy-an ang mga naapektahan sa demolisyon.
Samtang karong adlawa, laing notice to vacate usab ang ilang ipadala ngadto sa pipila ka mga molupyo diha sa barangay Duljo-Fatima. - Elly Bolonos (BANAT NEWS)