CEBU, Philippines – Mikabat sa 10 ka kilong pugapo ug suno nga pinintalan og kolor puwa ang gisakmit sa mga sakop sa Department of Veterinary Medicine and Fisheries (DVMF) sa Cebu City Hall gikan sa usa ka Muslim diha sa Pasil Fish Market kagahapon sa buntag.
Kini human masayri nga ang maong mga isda nga gitina og artificial nga kolor puwa sa negosyanteng Muslim nga nailhang si Busiran Jekeri, usa ka dakong kalapasan sa City Ordinance Number 2006, ang balaod nga nagdili sa mga vendors paggamit og formaldehyde ug ubang kemikal ngadto sa mga baligya niining mga isda ug uban pang produktong makaon gikan sa dagat.
Matud ni Dr. Alice Utlang, ang hepe sa DVMF nga ila lang pamultahon si Jekeri sa nahimo niining kalapasan sa ordinansa sa dakbayan, apan gipasidan-an siya nga kun makalapas pa siya pag-usab pasakaan na kini og kaso sa korte. Ang mga isdang nasakmit gipahatod dayon ni Utlang ngadto sa Cebu City Zoo diin nagpaabot ang mga binuhing hayop niini.
Gumikan niini pakigtagboan ni Utlang ang mga fish vendor ning dakbayan sa sunod semana aron pahibaw-on sa mga ordinansa sa siyudad nga magpahamtang og bug-at nga silot niadtong malapason niini. - Elly Bolonos (BANAT NEWS)