Pagpangulata og batang suspek sa Talisay police pa-imbestigahan sa CPPO

CEBU, Philippines – Si Supt. Erson Digal, officer-in-charge (OIC) sa kapulisan sa probinsya sa Sugbu mimandong paimbestigahan ang pasangil batok sa mga sakop sa Talisay Police Station nga nangulata ug migaid sa usa ka minor de edad nga suspek sa pagpanulis.

Sumala pa ni Digal seryoso ang maong akusasyon tungod kay ang mga ginikanan gikatahong mibahad pagdangop sa Commission on Human Rights (CHR).

Gimandoan ni Digal si Insp. Ruben Cuizon sa Provincial Investigation and Detective Management Branch nga paimbestigar og apil si Supt. Henry Biñas ug mga sakop nga sila si PO1 Jun Dave David ug PO2 Roelito Tano.

Buot matino ni Digal kung unsay tinuoray’ng nahitabo nganong gipasanginlan ang maong mga polis ug susama niana nga nasayod naman silang gidili gyud sa mga police nga kulatahon ang mga dinakpan sad-an man o dili.

Gani bisan kun sila mopahigayon og tactical interrogation sa mga dinakpan dili gyud kini dapatan gumikan kay usa kini ka kalapasan sa tawhanong katungod.

Gihatagan niini’g usa ka semana si Cuizon sa pag-imbestigar sa maong kaso.

Samtang si Supt. Henry Biñas, hepe sa syudad sa Talisay nagkanayon nga ang maong bata ila nang gipa-ubos sa medical test kini aron ilang masayran kung unsa ka tinuod ang iyang alegasyon batok sa duha ka polis.

Dugang pa ni Biñas nga kun ugaling mopasaka og kaso ang ginikanan sa menor de edad ila nalang gyud kini nga atubangon.

Butyag usab ni Biñas sa Banat News nga ang 16-anyos nga batang nabiktima sa maong menor de edad milagda na og affidavit aron mopasaka og kaso. - Guam Logroño uban sa report ni Lesley Caminade (BANAT NEWS)