CEBU, Philippines – Wa ka-ugpo ang usa ka level 2 nga drug pusher human kini madakpi sa joint operations sa Philippine Drugs Enforcement Agency (PDEA-7) ug Naval Special Operations Units ug Naval Intelligence Units diha sa sitio Lawis barangay Pasil ning dakbayan.
Ang tigpamaba sa PDEA-7 Jessie Tabanao nga gikahinabi sa Banat News miila sa akusado nga si Evangelito Ceniza, 44, nagpuyo sa nahisgutang dapit nadakpan sulod sa ilang panimalay pinasikad sa search warrant nga giluwatan ni Judge Silvestre Maamo Jr. sa Regional Trial Court.
Nakuha sa panimalay ni Ceniza ang upat ka mga gagmay’ng pakete nga may sulod nga gituohang shabu nga mokantidad og tag P500 matag pakete.
Matud pa ni Tabanao nga maka-disposed sa kapin sa 200 gramos nga shabu matag semana si Ceniza.
Gipadayag niini nga ang akusado ang hugot nga nanghimakak nga iya ang maong mga shabu tungod kay gipanag-iya kini sa iyang igsuong ginganla’g “Bebot.”
Si Ceniza nalakip sa order of battle sa PDEA-7 nga usa sa mga bigtime drug pusher dinhi sa dakbayan sa Sugbu ug taudtaud nang gipanid-an.
Kasong possession of illegal drugs ingon man paraphernalia ang ipasaka sa PDEA-7 karong adlawa isip kalapasan sa RA.9165 sa section 11 ug 12. - Guam Logroño (BANAT NEWS)