Mar, Chiz, Gibo magtigi dinhi sa Cebu

CEBU, Philippines - Tulo ka mga nangambisyong mahimong presidente sa nasud sa umaabot nga eleksyon ang gipaabot nga magtakos dinhi sa Sugbu niining semanaha alang sa usa ka forum.

Kini mao sila si Senador Mar Roxas, Senador 'Chiz' Escudero ug Defense Secretary Gilberto Teodoro nga gidungog na nga interesadong magpapili pagka-presidente sa nasud.

Ang tulo giimbitar isip mamumulong sa usa ka forum nga giulohan og "Facing Gold Challenges, Forging New Engagements" karong Huwebes.

Kini gipasiugdahan sa Makati Business Club uban sa pagpakig-alayon sa Cebu Business Club ug sa Cebu Chamber of Commerce and Industry (CCCI).

Usa lang ka topic ang giingong gihatag ug batbaton sa tulo ug kini may kalabutan sa nag-unang hagit alang sa kalamboan sa nasud.

Magtigi sila si Roxas, Escudero ug Teodoro pagpadayag sa ilang mga plano kung unsaon nila pagpalambo ang nasud taliwa sa giatubang nga krisis.

Human unya sa ilang pagpakigpulong, gisahon sila og mga pangutana sa mga panelists gikan sa nagkadaiyang sektor.

Gawas nilang Roxas, Escudero ug Teodoro duna pay laing giimbitar usab nga mamulong atol sa nahisgutang kalihukan.

Kini sama kang Kongresista Teofisto Guingona III nga maoy usa sa gikuhang resource person nga motuki labot sa reporma sa budget process.

Samtang ang executive director sa Philippine Business Education nga si Chito Salazar gitahasan usab nga mamulong labot sa reporma sa edukasyon.

Sa pikas bahin, ang chairman sa Coalition Against Corruption nga si Jose Cuisia Jr., gipaabot usab nga mopadangat og mensahe labot sa Transparency and Governance.

Gipaabot nga ang nahisgutang forum maghatag og katin-awan kung kinsa sa tulo ka presidentiables ang dunay labing maayo nga panglantaw alang sa kalamboan sa nasud. – BANAT NEWS