Gitigbas ug gipusil naangol

CEBU, Philippines – Naangol ang usa ka 38 anyos nga negosyante human kini tigbasa unya gipusil sa unom ka gidudahang tulisan didto sa barangay Cuanos, lungsod sa Minglanilla niadtong Biyernes sa alas 11:00 sa gabii.

Ang biktima mao si Jimmy Jimenez, 38, ulitawo, apan dunay kapuyo nga si Restituta Bastida, hingkod.

Samtang ang mga suspek giila usab sa kapolisan nga sila si RJ Bastida, Ritchie Bastida, Sonny Bastida, pulos hingkod, kauban ang lain pang tulo ka wala hiilhing lalaki kinsa pulos ra mga silingan sa biktima.

Si PO2 Avelino Celoria sa Minglanilla Police Station mibutyag sa Banat News  nga ang biktima uban sa kapuyo niini, nangatulog na unta niadtong higayona human manira sa ilang tindahan dihang nanuktok ang suspek nga si Ritchie kay mopalit og sigarilyo.

Ang kapuyo nga si Restituta maoy mibangon ug mi-abli dayon sa pultahan aron pagkuha og sigarilyo sa tindahan apan kalit lang misulod sa tindahan si Ritchie dayung ti-on sa iyang armas de fuego ug mideklarar og tulis.

Si Jimmy kinsa nakabantay midasmag dayon sa suspek ug naglinayogay sila hangtod sa gawas sa balay dihang ang laing suspek nga si Sonny milanit sa iyang sundang ug giligid og tigbas ang biktima hinungdan nga nabulit sa samad tinigbasan ang kamot niini nga gipanagang niya sa sundang.

Samtang samaron na ang biktima, si Ritchie nga nagkupot sa iyang armas de fuego mipusil sa biktima ug maayo nalang kay nakabantay ang naulahi ug nakadagan kini   paingon sa barangay hall ug didto nakapangayo og panabang. Sa pagresponde sa mga polis nakaeskapo na ang mga suspek ug padayon pang gipangita karon ang mga suspetsado. - Darrel a. Carumba (BANAT NEWS)