City treasurer palayason

CEBU, Philippines – Palayason na ni Mayor Tomas Osmeña ang iyang gikuha nga City Treasurer gikan sa Bureau of Local Government Finance (BLGF-7) nga si Renee Empaces tungod sa dili maayong performance niini pagdumala sa City Treasurer’s Office.

Nagduda si Osmeña nga dunay dili maayong nahitabo sulod mismo sa maong buhatan tungod sa iyang pagtuo nga miubos karon ang koleksyon sa siyudad.

Sa Statement of Fiscal Performance nga gipresentar ni Empaces ngadto sa City Council sa unang upat ka buwan sa tuig, misobra og P646 milyones ang tax collection sa siyudad. Apan matud ni Osmeña kun dili pa tungod sa halin sa luna diha sa South Road Properties (SRP) siguradong mikunhod karon ang koleksyon sa dakbayan.

Wala usab mahimuot ang mayor nga giapil pagkwenta ni Empaces ang halin sa SRP sa tax collection report niini nga gipadangat sa City Council.

Matud sa mayor nga iyang hinaguan ang nadawat sa siyudad nga mokapin sa P348 milyones nga pasiunang bayad sa halin sa SRP ug dili kang Empaces.

Labaw nang gikadismaya ni Osmeña ang kapakyas ni Empaces pagkolekta og buhis sa pipila ka pribadong mga tambalanan ug tunghaan sa dakbayan.

Partikular na niini ang mga proprietary institutions sama sa Cebu Doctor’s University, Cebu Doctor’s Hospital, Cebu Institute of Technology, Southwestern University, Sacred Heart Hospital, Cebu North General Hospital ug Velez General Hospital. - Elly Bolonos (BANAT NEWS)