Tomas ug Gwendolyn ulion

CEBU, Philippines – Gipaningkamotan karon sa partido sa administrasyon dinhi sa Sugbu nga magkauli sa maayong kabubut-on sila si Mayor Tomas Osmeña sa dakbayan ug Gobernador Gwendolyn Garcia.

Mao kini gibutyag ni Bert Empaces, tigpamaba sa Lakas-Christian Muslim Democrat Lakas-CMD dinhi sa Central Visayas nga gihiusa na karon ug nahimo nang Lakas Kampi CMD.

Matud ni Empaces nga nagtukod na sila karon og usa ka arbitration committee nga gitahasan sa paghilot sa kasungian tali ni Mayor Osmeña ug Gobernador Garcia.

Nagtuo si Empaces nga dili lisud uli-on ang maayong kabubut-on sa mayor ug gobernador tungod kay dili personal ang ilang away.

Matud niya nga kinahanglan gyud nga magkauli ang duha ka dagkong lider sa partido dinhi sa Sugbu aron makatabang sa mahimong standard bearer nila sa umaabot nga election sa tuig 2010. – BANAT NEWS