Peras sa Ecleo case gikalipay

CEBU, Philippines – Gikalipay man tuod ni Crusade Against Violence (CAV) national vice president Thelma Chiong ang pagsibog na sa kasong parricide batok ni PBMA Supreme Master Ruben Ecleo Jr. apan may duda si Chiong sa judge nga naghupot sa kaso ni Ecleo. Sumala pa ni Chiong   nga ila pa unang obserbahan si RTC-7 Branch 10 Judge Soliver Peras tungod kay ang naasoy nga huwes pairing judge sa kanhi naghupot sa kaso nga si RTC-7 Branch 9 Judge Jeraldine Faith Econg.

Matud pa ni Chiong nga basin og suod kaayo ni Judge Peras si Judge Econg, butang nga angayan nilang tutokan.

Mitataw hinuon si Chiong nga dako ang iyang pagtuo nga dili masayonsayon sa paghadlok sa mga sakop sa PBMA si Judge Peras tungod kay may bitbit kining baby armalite nga magamit sa pagprotektar sa iyang kaugalingon.

Nanghinaot si Chiong nga sa dili pa tiwason og husay ang kasong parricide unahon unta og dungog ni Judge Peras ang ilang duha ka mosyon nga dugay na kaayong na-pending sa sala pa ni Judge Econg, usa niini mao ang mosyon sa pagpakansela sa usa ka milyon ka pesos nga piyansa ni Ecleo tungod kay maayo man ang panlawas niini ug kanunay nga magsuroysuroy didto sa Batasang Pambansa uban ang inahan, Kongresista Glenda Buray Ecleo.

Sama ni Chiong, si Atty. Kit Enriquez, usa sa mga prosecutors sa kaso batok ni Ecleo nagtinguha usab nga matuki ni Judge Peras ang mosyon nga nagkanselar sa piyansa ni Ecleo aron mabalik na kini sa bilanggoan.

Naglaum lamang si   Enriquez nga sa higayon nga makanselar ang piyansa ni Ecleo wala na usay kinabuhi nga makalas sama sa pagkamatay sa 19 ka tawo apil na ang usa ka polis sa dihang gisilbi ang warrant of arrest batok ni Ecleo didto sa Dinagat island.

Matud pa ni Enriquez nga gusto sila nga mahuman na ang maong kaso sa sala ni Judge Peras. - Chester Abadilla (BANAT NEWS)