CEBU, Philippines - Duha ka tawo ang nabiktima sa pagpanunggab didto sa habagatang bahin ning lalawigan kagahapon.
Usa niini mao ang ex-convict nga si Gelacio Tanggaan alyas Teban hingkod, nga taga Upper Dam, barangay Pobalcion, lungsod sa Carcar, samtang ang laing nadunggaban mao si Michael Sotomayor, 18, ulitawo nga taga sitio Campagong, barangay Poblacion, lungsod sa Badian.
Si Tanggaan nasabak sa walang dughan dihang giluba kini ni Rey Campugan, taga Poblacion, Carcar didto sa diskohan sa Upper Dam sa miaging gabii.
Hinuon nalibre kini kay nadali pagdala sa mga silingan ngadto sa Vicente Sotto Memorial Medical Center sa dakbayan sa Sugbo, samtang ang suspek gipangita pa sa kapolisan human kini makasibat.
Samtang si Sotomayor didto lubaa ni Gilbert Archival, 18, ulitawo nga taga sitio Curvada, barangay Banhigan, Badian, sa merkado publiko sa Badian kagahapon sa kaadlawon.
Nasabak sa walang kilid ang biktima ug nalibre kini dihang nadala dayon ngadto sa Samboan Distric Hospital, samtang ang suspetsado padayon pang gipangita sa kapolisan human kini mosibat.
Nasayran gikan sa kapolisan nga ang duha ka pagpanunggab nahimo gumikan sa panagdumot. - BANAT NEWS