Nasunogan naglumpayat sa kalipay

CEBU, Philippines – Naglumpayat sa kalipay ang 655 ka pamilya nga mga biktima sa sunog sa sitio Manga ug sitio Limonsito sa barangay Umapad, dakbayan sa Mandaue dihang giduaw sila ni Kongresista Nerissa Soon-Ruiz sa ika-unom nga distrito niadtong miaging adlaw.

Kauban ni Kongresista Soon-Ruiz ang mga opisyal sa Quota Club of Mandaue kinsa nanghatag og 30 ka sakong bugas humay ngadto sa mga biktima.

Si Kapitan Zaldy Lumapas sa barangay Umapad maoy naggiya kang Kongresista Soon-Ruiz sa maong pagpanuaw uban nila ni Bise Mayor Carlo Fortuna, Konsehal Emiliano Rosal ug Konsehal Noeleen Borbajo.

Si Soon-Ruiz miingon nga ang bugas nga nadawat sa mga biktima   donasyon gihapon sa Quota Club of Mandaue human kini manghatag og pagkaon kanila pipila ka takna human sa pagkasunog.

Midugang si Soon Ruiz nga paningkamutan niya nga ang mga luna nga gipuy-an sa mga biktima hingpit na nilang mapanag-iya ubos sa Community Mortgage Program sa kagamhanan.

Gitataw sa kongresista sa ika-unom nga distrito nga himuon niya kutob sa iyang maabot nga makabaton og mga desenting pinuy-anan ang mga nasunogan.

Si Bise Mayor Fortuna sa iyang bahin miingon nga gihikay na niya karon ang hinabang nga salapi sa mga biktima sa sunog diin P10 mil alang sa tag-iya sa balay ug P3,000 mil usab alang sa mangangabang. - Romeo T. Limpangog ug Bong Soriano (BANAT NEWS)